لو تعبت من الصرف الكتير وبدأت تفكر في بكره وإزاي تأمّن نفسك فيه، أول حاجة بتيجي في بالك هي فكرة التوفير واللي هتساعدك تحوّش ويكون عندك مع الوقت أمان وحرية مالية.
ولما تيجي تفكر في توفير الفلوس، هتتفاجئ قد ايه التغييرات الصغيرة بتفرق مع الوقت. من أول التوفير في استهلاك الكهرباء والإنترنت، ولحد المصاريف اليومية، في أكتر من طريقة تقدر توفر وتحوّش منها فلوس كل شهر.
عشان كده في المقال ده، هنقولك على أفضل الخطط والنصائح عملية تقدر تبدأها من النهارده عشان تقلل المصاريف وتحوّش مبلغ كويس في كل شهر يخلّي مستقبلك آمن.
8 خطط للادخار والصرف بذكاء
1- اعمل ميزانية لنفسك
من أول وأهم خطوات تنظيم الفلوس وتوفير الفلوس، إنك تبدأ بميزانية شهرية. يعني ببساطة تقارن دخلك بالمصاريف اللي بتصرفها، وتشوف الأولويات اللي لازم تصرف عليها، وتبدأ ترتبها.
لو مش عارف تبدأ منين، تقدر بورقة وقلم وتكتب كل حاجة. طب أبدأ إزاي؟ جرب طريقة 50/30/20، الطريقة دي سهلة وفعّالة جدًا، وبتقول:
- 50% من الدخل للاحتياجات الأساسية (زي الأكل، الإيجار، الفواتير)
- 30% للكماليات أو الحاجات اللي بتحبها (زي الخروجات أو اللبس)
- 20% للادخار وسداد الديون (زي الجمعيات أو القروض)
اعرف اكتر عن طريقة 50/30/20 من هنا: قاعدة 50/30/20: سر الإدارة الذكية للفلوس
2- حط أهداف واضحة للادخار
عشان تقدر تحوّش بذكاء، لازم يكون عندك أهدف واضحة بتحوش عشانها، ومهم تكون واقعية ومناسبة لظروفك.
لو دخلك يسمح، ممكن هدفك يكون مثلاً إنك تحوّش 1000 جنيه في الشهر لأي استثمار صغير. ولو عندك ديون، ممكن تحط هدف بسيط زي إنك تدفع 100 جنيه زيادة شهرياً على القسط أو الدين اللي عليك. وحتى لو ظروفك صعبة، مفيش مشكلة تبدأ بـ 10 أو 20 جنيه كل أسبوع. على قد ما الرقم بسيط، بس مع الوقت هيكبر ويعمل فرق.
السر مش في الرقم، السر في الاستمرار. ابدأ بهدف يناسبك وخليه قدام عينك، ده اللي هيشجعك تكمل وتبني عادة التوفير.
3- تابع مصاريفك
مش هتعرف توفر فلوسك لو مش عارف بتصرف قد إيه! سجّل كل جنيه بيخرج منك كل شهر، واعرف الفرق بين اللي داخل واللي خارج.
الخطوة دي هتساعدك تتحكم في مصاريفك، وتوصّل لهدف التوفير أسرع. ممكن تكتبهم على ورقة، أو تستخدم تطبيق لمتابعة المصاريف بسيط على الموبايل. المهم تعرف فلوسك بتروح فين.
